ఖాట్మాండ: నేపాల్‌లో జరిగిన రోడ్డు ప్రమాదంలో 23మంది దుర్మరణం పాలయ్యారు. శుక్రవారం రాత్రి బొటానికల్ గార్డెన్ టూర్‌కు వెళ్లిన విద్యార్థుల బస్సు ఓ మారుమూల ప్రాంతంలో అదుపుతప్పి లోయలో పడింది. ఈ ప్రమాదంలో 23మంది చనిపోయినట్లు అధికారులు వెల్లడించారు. మరో 14మంది తీవ్రంగా గాయపడ్డారు. క్షతగాత్రులను చికిత్స నిమిత్తం సమీప ఆసుపత్రికి తరలించారు.

న్యూఢిల్లీ, డిసెంబర్ 21: కంప్యూటర్లలో నిక్షిప్తమైన సమాచారాన్ని పసిగట్టడం, పంపించే సందేశాలు, స్వీకరించే సమాచారాన్ని పర్యవేక్షించి తెలుసుకునే అధికారాన్ని పది కేంద్ర ఏజన్సీలకు అప్పచెప్పడం రాజ్యాంగ విరుద్ధమని సీపీఎం విమర్శించింది. ఈ మేరకు సీపీఎం పొలిట్‌బ్యూరో ప్రకటనను విడుదల చేసింది. వ్యక్తిగత గోప్యత హక్కుకు భంగం కలిగించే విధంగా కేంద్రం చర్యలు ఉన్నాయని సీపీఎం పేర్కొంది.

న్యూఢిల్లీ, డిసెంబర్ 21: రాజ్యసభలో గత తొమ్మిది రోజులుగా కొనసాగుతున్న గొడవ, గందరగోళం పట్ల దేశ ప్రజల్లో ఆందోళన చేటుచేసుకుంటున్నదని, ఇది మంచి పరిణామం కాదని ఉప రాష్టప్రతి, రాజ్యసభ చైర్మన్ ఎం. వెంకయ్య నాయుడు అన్నారు. సభను సజావుగా జరగనివ్వకపోవడం మంచి పరిణామం కాదని అన్ని రాజకీయ పార్టీలు, ఎంపీలను ఆయన హెచ్చరించారు.

న్యూఢిల్లీ, డిసెంబర్ 21: సైబర్ నేరాలను అరికట్టడంలో భాగంగా, కంప్యూటర్ సిస్టమ్స్‌లో ఉన్న సమాచారాన్ని కనుగొనేందుకు, పర్యవేక్షించేందుకు పది కేంద్రం ఆధీనంలో ఉంటే నిఘా ఏజన్సీలకు అధికారాన్ని ఇస్తూ కేంద్ర హోంమంత్రిత్వశాఖ ఆదేశాలు జారీ చేసింది. ఈ ఏజన్సీలకు కొత్తగా అధికారాలు ఏమీ ఇవ్వలేదని , పాత నిబంధనల మేరకే రూపొందించామని హోంమంత్రిత్వశాఖ ప్రతినిధి తెలిపారు.