హైదరాబాద్, నవంబర్ 3: ఎన్నికల్లో ఇచ్చిన హామీ మేరకు తండాలను పంచాయతీలుగా మార్చే ప్రక్రియకు ప్రభుత్వం శ్రీకారం చుట్టింది. తండాలను పంచాయతీలుగా మార్చేందుకు గతంలోనే క్యాబినెట్‌లో నిర్ణయం తీసుకున్నారు. తండాలను పంచాయతీలుగా మార్చడానికి అవసరం అయిన ప్రక్రియను ప్రారంభించాలని పంచాయతీరాజ్ శాఖ మంత్రి జూపల్లి కృష్ణారావు పంచాయతీరాజ్ శాఖ అధికారులను ఆదేశించారు.

గుంటూరు, నవంబర్ 3: వ్యాపారంతోనే రాష్ట్రం, దేశం అభివృద్ధి చెందుతాయని, సంపద పెరగాలంటే పెట్టుబడులను ఆహ్వానించక తప్పదని కేంద్ర పట్టణాభివృద్ధి శాఖ మంత్రి ఎం.వెంకయ్యనాయుడు అన్నారు. అభివృద్ధి చెందిన అమెరికా, కమ్యూనిస్టు చైనా దేశాలు సైతం పెట్టుబడులను ఆహ్వానిస్తున్నాయని ఉదహరించారు. సంపద పెరగాలంటే ‘ఈజ్ ఆఫ్ డూయింగ్ బిజినెస్’ తప్పనిసరన్నారు. దేశం ముందుకెళ్లాలంటే రాష్ట్రాలు పురోగమించాల్సిన అవసరం ఉందన్నారు.

అమరావతి, నవంబర్ 3: రాష్ట్రంలో ఉచిత వైద్యసేవలను మరింత విస్తరించేందుకు ప్రభుత్వం నిర్ణయించింది. పేదలు, బడుగు బలహీన వర్గాల ప్రజలకు ఉచిత వైద్యం చేసేందుకు ఇస్తున్న ఆర్థిక సాయాన్ని రూ.2లక్షల నుంచి రూ.2.5లక్షలకు పెంచిన ప్రభుత్వం, తాజాగా గుండె, ఊపిరితిత్తుల మార్పిడి అంశాలను కూడా ఈ పరిధిలోకి తీసుకువచ్చింది. రాష్ట్రంలో ఎన్టీఆర్ వైద్యసేవ కింద 421 ఆసుపత్రులు వైద్యసేవలు అందిస్తున్నాయి.

విజయవాడ, నవంబర్ 2: దేశాన్ని, రాష్ట్రాన్ని అత్యంత శక్తిమంతంగా తీర్చిదిద్దేందుకు ప్రజలు కృషి చేయాలని విశ్వంజీ విశ్వంభర యోగి మహరాజ్ పిలుపునిచ్చారు. విజయవాడ ఆదాయపు పన్ను శాఖ ఆధ్వర్యంలో నిర్వహిస్తున్న విజిలెన్స్ అవేర్‌నెస్ వారోత్సవాల్లో భాగంగా ‘దైనందిన జీవితంలో నీతి నిజాయితీ నైతిక విలువలు’ అనే అంశంపై బుధవారం నగరంలో నిర్వహించిన అవగాహన సదస్సులో స్వామీజీ మాట్లాడారు.