హైదరాబాద్, జనవరి 6: నవ్యాంధ్ర రాజధాని అమరావతి నిర్మాణం కోసం ప్రతి విద్యార్థి,ఉపాధ్యాయుల నుంచి 10 రూపాయిలు సేకరించాలన్న ఎపి ప్రభుత్వ నిర్ణయంపై హైకోర్టు బుధవారం స్టే విధించింది. విద్యార్ధుల నుండి విరాళాల సేకరణకు సర్క్యూలర్‌ను ఎలా విడుదల చేస్తారని హైకోర్టు న్యాయమూర్తి పి వి సంజీవ్ కుమార్ ప్రశ్నించారు. విరాళాల సేకరణకు ఆదేశాలు ఇచ్చే అధికారం అధికారులకు లేదని స్పష్టం చేశారు.

గుంటూరు, జనవరి 6: గుంటూరు వేదికగా జరిగిన రాజధాని అమరావతి మాస్టర్ ప్లాన్‌పై అవగాహన సదస్సుకు హాజరైన రైతులు తమ అభ్యంతరాలను వెల్లడించి, న్యాయం చేయాలని డిమాండ్ చేశారు. రాజధాని రహదారుల వలన జరుగుతున్న నష్టంపై ఆందోళనతో ఉన్న రైతులు సభకోసం బుధవారం ఉదయమే గుంటూరు రెవెన్యూ కళ్యాణ మండపానికి చేరుకున్నారు.

హైదరాబాద్‌: కేసెట్‌ కారణంగా ఎంసెట్‌ పరీక్షలను ఏప్రిల్‌ 29న నిర్వహించాలని ఆంధ్రప్రదేశ్‌ ఉన్నత విద్యామండలి నిర్ణయించింది. తొలుత ఈ పరీక్షను మే 5న నిర్వహించాలని నిర్ణయించిన సంగతి తెలిసిందే. అయితే పరీక్షలను ఆరు రోజులు ముందుగానే నిర్వహించాలని ఉన్నత విద్యాశాఖ అధికారులు నిర్ణయించారు.

హైదరాబాద్: గ్రేటర్ హైదరాబాద్ మున్సిపల్ కార్పోరేషన్ ఎన్నికల్లో నామినేషన్ పత్రాలతో స్వల్ప మార్పులు చేస్తూ ఉత్తర్వులు జారీ చేశారు. ఇకపై నామినేషన్ పత్రాలలో 7, 8, 10 కాలమ్స్‌ను సవరిస్తూ ఉత్తర్వులు ఇచ్చారు. ఇకపై పోటీ చేసే అభ్యర్థి వార్డు నెంబరు, వార్డు పేరు, ఓటరు జాబితాలో సీరియల్ నెంబరును విధిగా నామినేషన్ పత్రాల్లో పేర్కొనాలంటూ ఉత్తర్వుల్లో పేర్కొన్నారు.