హైదరాబాద్, జూలై 16 : ముస్లిం మహిళల పెళ్లిల్లకోసం ఉద్దేశించిన ‘షాదీ ముబారక్’ పథకం ఇక నుండి ఎమ్మెల్యేల చేతుల్లోకి వెళుతోంది. శనివారం ఉత్తర్వులు జారీ అయ్యాయి. ఈ పథకం కింద వచ్చే దరఖాస్తులను ఇక నుండి తహశీల్‌దార్లు ప్రాసెస్ చేసి, సరిగ్గా ఉన్నాయో లేదో పరిశీలిస్తారు. ముస్లింలలో పేదవర్గాలకు చెందిన మహిళల వివాహాలకోసం ప్రభుత్వం 51 వేల రూపాయలు ఇస్తోంది.

హైదరాబాద్: మహబూబ్‌నగర్ జిల్లా పునర్విభజనలో గద్వాల కేంద్రంగా కొత్త జిల్లాను ఏర్పాటు చేయాలని కోరుతూ ఈనెల 19న పాదయాత్ర చేస్తానని కాంగ్రెస్‌కు చెందిన మాజీ మంత్రి డికె అరుణ శనివారం ప్రకటించారు. జమ్ములమ్మ ఆలయం నుంచి ఆలంపూర్ జోగులాంబ ఆలయం వరకూ తన పాదయాత్ర జరుగుతుందని చెప్పారు. జిల్లా కేంద్రంగా ఏర్పాటు చేసేందుకు గద్వాలకు అన్ని అర్హతలున్నాయని ఆమె తెలిపారు.

హైదరాబాద్: పాతబస్తీలో పోలీసులు అరెస్టు చేసిన ఐసిస్ సానుభూతిపరులకు న్యాయ సహాయం చేస్తానని వ్యాఖ్యానించినందుకు హైదరాబాద్ ఎంపీ,ఎంఐఎం పార్టీ అధినేత అసదుద్దీన్ ఒవైసీపై సరూర్‌నగర్ పోలీసులు దేశద్రోహం నేరం కింద కేసు నమోదు చేశారు. కరుణాకర్ అనే న్యాయవాది వేసిన పిటిషన్‌ను పరిశీలించాక ఈమేరకు కేసు నమోదు చేయాలంటూ రంగారెడ్డి జిల్లా కోర్టు సరూర్‌నగర్ పోలీసులను ఆదేశించింది.

హైదరాబాద్, జూలై 15: రాష్ట్ర ఖనిజాభివృద్ధి శాఖ చైర్మన్‌గా నియమితులైన శేరి సుభాష్‌రెడ్డి శుక్రవారం సంస్థ కార్యాలయంలో పదవీ బాధ్యతలు చేపట్టారు. ఐటి శాఖ మంత్రి కె తారక రామారావు సమక్షంలో శేరి సుభాష్‌రెడ్డి బాధ్యతలు చేపట్టారు.