విశాఖపట్నం, జూలై 3: ఆంధ్రప్రదేశ్ ప్రభుత్వం తీసుకున్న నూతన మద్యం పాలసీ ఆరంభంలోనే తడబడుతోంది. కొత్తగా మద్యం దుకాణాల జారీ, బార్లకు లైసెన్సుల మంజూరు వంటి అంశాల్లో ప్రభుత్వం తీసుకున్న నిర్ణయం పాలసీ ప్రారంభమై మూడు రోజులు గడుస్తున్నా కొలిక్కి రాలేదు.

రంపచోడవరం, జూలై 3: ఏజెన్సీలో వైద్య సేవలు విస్తృత పరచడానికి అవసరమైన అన్ని చర్యలూ చేపడుతున్నామని ఆంధ్రప్రదేశ్ శాసన సభ స్పీకర్ కోడెల శివప్రసాదరావు అన్నారు. భారీగా జ్వర మరణాలు సంభవించిన తూర్పు గోదావరి జిల్లా ఏజెన్సీలో సోమవారం ఆయన పర్యటించారు. ఈ సందర్భంగా రంపచోడవరం ప్రభుత్వాసుపత్రిలో చికిత్స పొందుతున్న చాపరాయి గ్రామస్థులను కోడెల పరామర్శించారు.

హైదరాబాద్, జూలై 3: సదావర్తి సత్రం భూములను తక్కువ ధరకే టిడిపి నేతలు కొట్టేయాలని చేసిన ప్రయత్నాలకు ముఖ్యమంత్రి చంద్రబాబు నాయుడు సహకరించారని వైఎస్సార్ కాంగ్రెస్ పార్టీ ఎమ్మెల్యే ఆళ్ళ రామకృష్ణా రెడ్డి విమర్శించారు. ఆభూములపై హైకోర్టు ఇచ్చిన తీర్పును స్వాగతిస్తున్నామని అన్నారు. హైకోర్టు తీర్పు ప్రకారం తాము డబ్బులు కడతామని తెలిపారు.

శ్రీశైలం, జూలై 3: ఆశాడ పౌర్ణమిని పురస్కరించుకుని ఈ నెల 9న శ్రీశైల భ్రమరాంబికకు శాఖంబరి అలంకారంలో ప్రత్యేక పూజలు నిర్వహించనున్నారు. మూలమూర్తిని వివిధ రకాల కూరగాయలు, ఆకుకూరలు, ఫలాలతో అలంకరించనున్నారు. ఆ రోజున అమ్మవారికి విశేష పూజలు నిర్వహించనున్నట్లు దేవస్థానం ఇఓ నారాయణ భరత్‌గుప్త తెలిపారు.