న్యూఢిల్లీ: కరోనా కేసుల వెల్లడిలో పారదర్శకంగా ఉన్నామని కేంద్రం వెల్లడించింది. ఈ మేరకు కేంద్ర ఆరోగ్య మంత్రిత్వ శాఖ కార్యదర్శి లవ్ అగర్వాల్ మాట్లాడుతూ ప్రొటోకాల్‌ను అనుసరిస్తూ గంటలోనే కేసుల తాజా పరిస్థితిని వివరిస్తున్నామని అన్నారు. ప్రజల్లో ఆందోళన రేకెత్తించాలని, కేవలం పరీక్షల కోసం పరీక్షలు చేయాలనే ఉద్దేశం ప్రభుత్వానికి లేదని అన్నారు.

శ్రీనగర్: వైష్ణోదేవి యాత్రను నిలిపివేశారు. కరోనా వైరస్ వ్యాప్తి కారణంగా ఈ నిర్ణయం తీసుకున్నారు. వైరస్ వ్యాప్తిని నిరోధించే చర్యలలో భాగంగా వైష్ణోదేవి యాత్రను నిలిపివేశారు. వైష్ణోదేవి దర్శన యాత్రను రద్దుచేసుకోవాలని ఆలయ బోర్డు సైతం విజ్ఞప్తిచేసింది. అంతేకాకుండా జమ్మూకాశ్మీర్‌కు రాకపోకలు సాగించే అన్ని అంతరాష్ట్ర బస్ సర్వీసులను కూడా రద్దు చేసినట్లు జమ్మూకాశ్మీర్ యంత్రాంగం తెలిపింది.

న్యూఢిల్లీ: భారత సైన్యంలో ఒకరికి కరోనా సోకింది. ఈ మేరకు సైనికవర్గాలు నిర్థారించాయి. లద్దాఖ్‌లోని స్కౌట్స్ దళానికి చెందిన సైనికునికి ఈ వైరస్ సోకటంతో అతని కుటుంబాన్ని క్వారైంటైన్‌లో ఉంచారు. గత కొన్ని రోజుల క్రితం ఈ సైనికుని తండ్రి తీర్థయాత్రల కోసం ఇరాన్ వెళ్లారు. ఆయన భారతదేశానికి తిరిగివచ్చిన తరువాత క్వారైంటైన్‌లో ఉన్నారు.

న్యూఢిల్లీ: దేశంలో కరోనా బాధితుల సంఖ్య 147కు చేరుకుంది. తాజాగా పశ్చిమబెంగాల్‌లో ఒక వ్యక్తికి కరోనా సోకినట్లు వైద్యాధికారులు వెల్లడించారు. అలాగే ఈ కరోనా మహారాష్టల్రో తీవ్రస్థాయిలో ఉంది. పూణెలో 28 సంవత్సరాల యువతికి కరోనా నిర్థారణ అయినట్లు కలెక్టర్ నావెల్ కిశోర్ వెల్లడించారు. మహారాష్టల్రో 49 మందికి కోవిడ్-19 పాజిటివ్ కేసులు ఉన్నాయి. కరోనా సోకిన 147మందిలో ముగ్గురు మరణించగా, 14 మంది కోలుకున్నారు.