నార్కట్‌పల్లి, డిసెంబర్ 2: జెనెటిక్ మాలిక్యులర్ డయాగ్నసిస్ ఇన్ మోడ్రన్ మెడిసిన్ పేరుతో అంతర్జాతీయ వైద్యుల సమ్మేళనం తెలంగాణ రాష్ట్రంలో మొట్టమొదటిసారిగా నల్లగొండ జిల్లా నార్కట్‌పల్లి మండల కేంద్రంలో ఈనెల 16 నుంచి నిర్వహించనున్నట్లు కామినేని వైద్యుల బృందం పేర్కొంది.

హైదరాబాద్, డిసెంబర్ 2: తెలంగాణ రాష్ట్రంలో 2886 బాల్యవివాహాలను నిలిపివేసి వారి సంరక్షణ, భద్రతకు అవసరమైన చర్యలు తీసుకున్నట్లు రాష్ట్ర మహిళా సంక్షేమ శాఖ ప్రకటించింది. త్వరలో మహిళా హెల్ప్‌లైన్ 181ను రాష్ట్రంలో ఏర్పాటు చేయనున్నారు. పిల్లల దత్తత ప్రక్రియ సరళీకృతం చేశామని, 449 మంది పిల్లలను దత్తతకు ఇచ్చామని, 45 మంది పిల్లలను విదేశీయులకు దత్తతకు ఇచ్చినట్లు ఆ శాఖ పేర్కొంది.

హైదరాబాద్, డిసెంబర్ 2: తెలంగాణలో ప్రజా వ్యతిరేక పాలన కొనసాగుతోందని వాటిపై ఉద్యమాలను ఇక ఉద్ధృతం చేయాలని బిజెపి రాష్ట్ర అధ్యక్షుడు డాక్టర్ కె లక్ష్మణ్ పేర్కొన్నారు. యువకులకు ఉద్యోగాల ఆశ చూపి అధికారంలోకి వచ్చిన తర్వాత మొండి చేయి చూపించిందని, ఫీజు రియంబర్స్‌మెంట్ సకాలంలో చేయకపోవడం వల్ల పేద, మధ్యతరగతి విద్యార్ధులు తీవ్ర ఆందోళనకు గురవుతున్నారని పేర్కొన్నారు.

హైదరాబాద్, డిసెంబర్ 2: లే అవుట్ రెగ్యులరైజేషన్ స్కీమ్ (ఎల్‌ఆర్‌ఎస్) కింద దరఖాస్తు చేసుకోవడానికి ఈ నెలాఖరు వరకు ప్రభుత్వం గడువు పొడిగించింది. గతంలో విధించిన రుసుంపై అదనంగా 20 శాతం చెల్లించి తాజాగా దరఖాస్తు చేసుకోవడానికి అవకాశం కల్పించినట్టు కూడా మున్సిపల్‌శాఖ విడుదల చేసిన ఉత్తర్వులలో పేర్కొంది.