హైదరాబాద్, నవంబర్ 29: ప్రధాని నరేంద్ర మోదీ పెద్ద నోట్లను రద్దు చేయడం వల్ల జిడిపి రెండు శాతం పడిపోతుందని టికాంగ్రెస్ నాయకుడు, మాజీ మంత్రి మర్రి శశిధర్ రెడ్డి ఆందోళన వ్యక్తం చేశారు. దాదాపు 57 శాతం వ్యవసాయ రంగంపై ఆధారపడి జీవిస్తున్న ప్రజలకు, నగదు రహిత లావాదేవీలు సాధ్యమేనా? అని ఆయన మంగళవారం విలేఖరుల సమావేశంలో మాట్లాడుతూ కేంద్రాన్ని ప్రశ్నించారు.

హైదరాబాద్, నవంబర్ 29: రైతుల సమస్యలపై టిటిడిపి వర్కింగ్ ప్రెసిడెంట్ రేవంత్ రెడ్డి ఈ నెల 6న చేపట్టిన ‘రైతు పోరు యాత్ర’ బుధవారం (30న) ముగియనున్నది. ఈ నెల 6న భూపాల్‌పల్లి జిల్లా నుంచి మొదలైన రైతు పోరు యాత్ర వైరా, ఖమ్మం, పెద్దపల్లి, సూర్యాపేట, నల్లగొండ మీదుగా సాగింది. ప్రతి రోజూ 15 నుంచి 20 కిలో మీటర్ల వరకు పాదయాత్ర చేసి గ్రామీణ ప్రజలను, రైతులను కలిసి వారి సమస్యలు తెలుసుకున్నారు.

హైదరాబాద్, నవంబర్ 28: పెద్ద నోట్ల రద్దుపై జనం నిరసన, ఆగ్రహం వ్యక్తం చేస్తున్నా సోమవారం వివిధ పార్టీలు నిర్వహించిన ‘బంద్’ ప్రభావం ఎక్కడా కనిపించలేదు. ప్రధాన ప్రతిపక్షమైన కాంగ్రెస్, వామపక్షాలు ఎవరికి వారే నిర్వహించడం వల్లే బంద్ విజయవంతం కాలేదు. జంట నగరాల్లో వ్యాపార, వాణిజ్య సంస్థలు బంద్‌లో పాల్గొనలేదు. సినిమా హాళ్లు, విద్యా సంస్థలు మూత పడలేదు. ఆర్టీసీ బస్సులు రోడ్డెక్కాయి.

హైదరాబాద్, నవంబర్ 28: తెలంగాణ ముఖ్యమంత్రి క్యాంపు కార్యాలయాన్ని ఏడాదిలోగా యుద్ధప్రాతిపదికన నిర్మించిన ప్రభుత్వం, పేదలకోసం ఉద్దేశించిన డబుల్ బెడ్‌రూం ఇళ్లపథకాన్ని ఎందుకు నిర్లక్ష్యం చేస్తోందని తెలంగాణ జాయింట్ యాక్షన్ కమిటీ (టి-జాక్) చైర్మన్ ప్రొఫెసర్ కోందడరాం ప్రశ్నించారు. సోమవారం ఆయన ఇక్కడ మీడియా ప్రతినిధులతో మాట్లాడుతూ, వాస్తవంగా ముఖ్యమంత్రి క్యాంపు కార్యాలయం కోసం ఇప్పటికే ఒక భవనం ఉందన్నారు.