తిరుపతి, నవంబర్ 1: కైశిక ద్వాదశి పర్వదినాన్ని పురస్కరించుకుని తిరుమల శ్రీవారి ఆలయంలో బుధవారం కైశిక ద్వాదశి ఆస్థానాన్ని టిటిడి ఘనంగా నిర్వహించింది. ఉదయం 4.30 నుంచి 5.30 గంటల మధ్య శ్రీ ఉగ్రశ్రీనివాస మూర్తి ఉభయనాంచారులతో కలిసి మాడ వీధులలో ఊరేగించారు. ఆ తరువాత అర్చకులు పురాణ పఠనంతో కైశిక ద్వాదశి ఆస్థానాన్ని ఘనంగా నిర్వహించారు.

విజయవాడ, నవంబర్ 1: రాష్ట్ర అసెంబ్లీ సమావేశాలు ఈ నెల 10 నుంచి నిర్వహించేందుకు ప్రభుత్వం సన్నాహాలు చేస్తోంది. సమావేశాలు 10 రోజుల పాటు నిర్వహించాలని ప్రతిపాదించింది. కచ్చితంగా ఎన్ని రోజులు నిర్వహించాలన్న అంశంపై బిజినెస్ అడ్వయిజరీ కమిటీ సమావేశంలో నిర్ణయం తీసుకోనున్నారు.

విజయవాడ, నవంబర్ 1: ప్రభుత్వ ఉద్యోగుల వయోపరిమితి కుదింపునకు సంబంధించి ఉత్తర్వుల ముసాయిదా లీక్ వ్యవహారంలో మరొకరిపై ప్రభుత్వం వేటు వేసింది. తాజాగా జలవనరుల శాఖలో సెక్షన్ ఆఫీసర్‌గా పనిచేస్తున్న వెంకటరామిరెడ్డిని సస్పెండ్ చేస్తూ బుధవారం ఉత్తర్వులు జారీ చేసింది. ప్రభుత్వ ఉద్యోగులను 50 ఏళ్లకే పదవీ విరమణ చేయించేందుకు వీలుగా తయారుచేసిన ఉత్తర్వుల ముసాయిదా గతంలో లీకైన విషయం తెలిసిందే.

విజయవాడ, అక్టోబర్ 31: రాష్ట్రంలో ఈ ఆర్థిక సంవత్సరం మొదటి త్రైమాసికంలో వ్యవసాయం, దాని అనుబంధ రంగాల్లో లక్ష్యాలను మించి 27.60 శాతం వృద్ధిరేటు నమోదైనట్లు ఆర్థికమంత్రి యనమల రామకృష్ణుడు చెప్పారు. వెలగపూడి సచివాలయంలోని తన కార్యాలయంలో మంగళవారం ఉదయం ప్లానింగ్ శాఖ అధికారులతో మొదటి, రెండవ త్రైమాసిక ఫలితాలను మంత్రి సమీక్షించారు.