విజయవాడ, ఆగస్టు 24: రాష్ట్రంలో మరో కొత్త పార్టీ జన జాగృతి పార్టీ ఆవిర్భవించింది. అరకు ఎంపీ కొత్తపల్లి గీత ఈ పార్టీని విజయవాడలో శుక్రవారం ప్రకటించారు. ఈ సందర్భంగా లోగోను కూడా ఆవిష్కరించిన గీత తమ పార్టీ గుర్తుగా గొడుగును ఎంపిక చేశారు. ఈ సందర్భంగా ఏర్పాటు చేసిన మీడియా సమావేశంలో మాట్లాడుతూ ఏపీలో రాజకీయాలు రెండు పార్టీలు, రెండు కులాలకే పరిమితం కావడం దురదృష్టకరమన్నారు.

యలమంచిలి, ఆగస్టు 24:తమ పార్టీ అధికారంలోకి వస్తే మూతపడిన చక్కెర కర్మాగారాలను తెరిపిస్తామని వైకాపా అధినేత జగన్ ప్రకటించారు. యలమంచిలిలో శుక్రవారం ప్రజా సంకల్పయాత్రలో భాగంగా జరిగిన బహిరంగ సభలో మాట్లాడిన ఆయన టీడీపీ ప్రభుత్వ పాలనలో రాష్ట్రంలో సమస్యలు పెరిగిపోతున్నాయని ధ్వజమెత్తారు. రైతన్నలు ఆశించే రాజన్న పాలన తమతోనే సిద్ధిస్తుందన్నారు.

అమరావతి: విశాఖపట్నంలో సబ్‌మెరైన్ హెరిటేజ్ మ్యూజియం ఏర్పాటుకు మాస్టర్‌ప్లాన్ రూపొందించాలని అధికారులను ముఖ్యమంత్రి చంద్రబాబునాయుడు ఆదేశించారు. పర్యాటకానికి ఆతిథ్యం అతిముఖ్యమని స్పష్టం చేసిన ఆయన అతిథుల అభిమానం పొందటం వల్లే పర్యాటక అభివృద్ధి సాధ్యమవుతుందన్నారు. పర్యాటకుల రాక ఆయా విభాగాల తీరుపై ఆధారపడి ఉందని ఉద్ఘాటించారు.

బళ్ళారి, ఆగస్టు 23: ఎగువ ప్రాంతాల్లో వర్షాలు తగ్గుముఖం పట్టడంతో తుంగభద్ర జలాశయానికి వరద తగ్గింది. దీంతో జలాశయం 12 గేట్లను రెండు అడుగుల మేర ఎత్తి దిగువ నదిలోకి 75,858 క్యూసెక్కుల నీరు విడుదల చేస్తున్నారు. జలాశయం పూర్తిస్థాయి నీటిమట్టం 1633 అడుగులు కాగా గురువారం 1631.17 అడుగులుగా నమోదైంది. ఇన్‌ఫ్లో 65,948 క్యూసెక్కులు కాగా ఔట్‌ఫ్లో 75,858 క్యూసెక్‌లు.