హైదరాబాద్: వాతావరణ ప్రభావం వల్ల తెలుగు రాష్ట్రాల్లో కురుస్తున్న వర్షాలకు ప్రజలు సేదతీరుతున్నారు. ఆంధ్రప్రదేశ్‌లో ఉరుములు, పిడుగులతో కూడిన వర్షాలు పడే అవకాశం ఉందని రాష్ట్ర విపత్తు నివారణ సంస్థ చేసిన హెచ్చరికతో అదికారులు అప్రమత్తమయ్యారు. కృష్ణాజిల్లాలోని తిరువురు, గన్నవరం, కైకలూరు, గుంటూరు జిల్లాలోని చిలకలూరిపేట తదితర ప్రాంతాల్లో వర్షాలు కురుస్తున్నాయి.

అమరావతి : రాష్ట్రంలో వాతావరణ మార్పులు, పిడుగులు పడుతున్న నేపథ్యంలో అప్రమత్తంగా ఉండాలని అధికారులను ముఖ్యమంత్రి చంద్రబాబు ఆదేశించారు. రాష్ట్ర విపత్తు నిర్వహణ సంస్థ మరింత అప్రమత్తంగా ఉండాలన్నారు.

హైదరాబాద్: తెలంగాణలో జయ శంకర్ ఆశయాలు నెరవేరటం లేదని తెలంగాణ జన సమితి అధ్యక్షుడు కోదండరాం మండిపడ్డారు. తెలంగాణ జన సమితి పార్టీ కార్యాలయంలో రాష్ట్ర అవతరణ వేడుకలు ఘనంగా నిర్వహించారు. కోదండరాం జాతీయ జెండాను ఆవిష్కరించారు. అనంతరం మాట్లాడుతూ రైతు ఆత్మహత్యలకు ప్రభుత్వం దగ్గర సమాధానం లేదని, నాలుగు వేలతో రైతుకు అన్ని సమస్యలు తీరిపోతాయా? అని ప్రశ్నించారు.

విజయవాడ : ఆంధ్రప్రదేశ్‌పై కేంద్రం సవతి తల్లి ప్రేమను చూపిస్తోందని చంద్రబాబు విమర్శించారు. విజయవాడ బెంజ్‌ సర్కిల్‌లో నవ నిర్మాణ దీక్షను నిర్వహించారు. ఈ సందర్భంగా డీవీ మ్యానర్‌ నుంచి చంద్రబాబునాయుడు ర్యాలీగా బెంజ్‌సర్కిల్‌కు కాలినడకన చేరుకున్నారు. ప్రజలతో ‘ప్రతిజ్ఞ బూనుదాం, ప్రగతి సాదిద్ధాం’ నినాదంలో ప్రతిజ్ఞ చేయించారు. అనంతరం ప్రజలనుద్దేశించి ప్రసంగించారు.