హైదరాబాద్, నవంబర్ 9: తెలంగాణ జైళ్ల శాఖ ప్రవేశపెట్టిన నూతన సంస్కరణల అమలును పలువురు ప్రశంసించారు. గురువారం చంచల్‌గూడ జైలులో జైళ్ల సంస్కరణలు-అమలుపై జాతీయ సదస్సు జరిగింది. ఈ సదస్సుకు దేశంలోని 14 రాష్ట్రాలకు చెందిన ప్రతినిధులు హాజరయ్యారు. ఈ సందర్భంగా తెలంగాణ జైళ్లశాఖ ప్రవేశపెట్టి, అమలుపరుస్తోన్న సంస్కరణలను అధ్యయనం చేశారు. అమలు తీరును అభినందించారు.

నిజామాబాద్, నవంబర్ 9: రబీలో వ్యవసాయ రంగానికి సరిపడా సాగు నీటిని అందించేలా ప్రణాళికలు రూపొందిస్తున్నామని, సాగు జలాల విషయంలో రైతులు ఎలాంటి ఆందోళనకు గురి కావాల్సిన అవసరం లేదని రాష్ట్ర వ్యవసాయ శాఖ మంత్రి పోచారం శ్రీనివాస్‌రెడ్డి భరోసా కల్పించారు. నిజాంసాగర్ ఆయకట్టు కింద ఒక్క గుంట భూమి సైతం ఎండిపోనివ్వకుండా, ప్రతి ఎకరాకు సాగునీరందిస్తామని అన్నారు.

హైదరాబాద్, నవంబర్ 9: తెలంగాణ చరిత్రను తిరగ రాస్తామని ముఖ్యమంత్రి కెసిఆర్ ప్రకటించారు. మైనారిటీ సంక్షేమంపై శాసనసభలో జరిగిన చర్చకు గురువారం సమాధానం ఇస్తూ, తెలంగాణకు గొప్ప చరిత్ర ఉందన్నారు. అన్ని మతాలు, కులాలవారు కలిసిమెలిసి జీవిస్తున్నారని, గత మూడేళ్లలో మతకలహాల జాడలేదని గుర్తు చేశారు. గతంలో రాజకీయాల లబ్దికోసం మతకలహాలు సృష్టించేవారని కెసిఆర్ ఆరోపించారు.

హైదరాబాద్, నవంబర్ 9: మైనార్టీలు, గిరిజనులకు రిజర్వేషన్లు పెంచే అంశం కేంద్ర ప్రభుత్వంలో పెండింగ్‌లో ఉందని, ఈ వర్గాలకు రిజర్వేషన్ల పెంపును సాధించి తీరుతామని ముఖ్యమంత్రి కె చంద్రశేఖర్‌రావు ధీమా వ్యక్తం చేసారు. తెలంగాణ రాష్ట్రం ఏర్పడిన తర్వాత మారిన సామాజిక పరిస్థితులు, జనాభాకు అనుగుణంగా రిజర్వేషన్లు పెంచాలని ఇప్పటికే ప్రధాన మంత్రిని కోరాగా సానుకూలంగా స్పందించారని ముఖ్యమంత్రి తెలిపారు.