హైదరాబాద్, ఆగస్టు 8: భూసేకరణకు సమగ్ర విధానాన్ని అనుసరిస్తున్నట్టు తెలంగాణ ప్రభుత్వం సోమవారం హైకోర్టు ముందు అఫిడవిట్ దాఖలు చేసింది. రైతుల నుంచి నేరుగా భూములు కొనుగోలు చేసేందుకు ఉద్దేశిస్తూ సర్కరు జారీ చేసిన జీవో 123ను కొట్టివేస్తూ హైకోర్టు బుధవారం తీర్పు ఇచ్చిన దరిమిలా ప్రభుత్వం రైతుల పునరావాసానికి సంబంధించి తీసుకున్న చర్యలను సోమవారం హైకోర్టుకు వివరించింది.

చిత్తూరు, ఆగస్టు 8: ప్రత్యేక హోదా విషయంలో రాజీలేని పోరాటం చేస్తానని ముఖ్యమంత్రి చంద్రబాబునాయుడు తెలిపారు. సోమవారం తన సొంత నియోజకవర్గం కుప్పంలో జరిగిన పలు కార్యక్రమాల్లో ఆయన పాల్గొన్నారు. రాష్ట్ర విభజన హేతుబద్ధంగా జరగలేదని, దానివల్ల అనేక అనర్థాలు తలెత్తాయని చెప్పారు. విభజన అనంతరం రాష్ట్రం ఆర్థికంగా చితికిపోవడంతోపాటు రాజధాని లేని రాష్ట్రంగా నిలిచిందన్నారు.

అనంతపురం, ఆగస్టు 8: టమోటా ధర ఒక్కసారిగా పడిపోయింది. కిలో టమోటా ధర రూ.2కు పడిపోవడంతో సోమవారం అనంతపురంలో రైతులు ఆందోళనకు దిగారు. జాతీయరహదారిపై టమోటాలు పారబోసి నిరసన తెలిపారు. నగరంలోని కక్కలపల్లి వద్ద ఉన్న టమోటా మార్కెట్‌కు సోమవారం పది టన్నుల టమోటా వచ్చింది. దీంతో ధర అమాంతం పడిపోయింది. 15 కేజీల ట్రే ధర రూ.30 లోపే పలికింది. అంతకు మించి కొనడానికి వ్యాపారులు విముఖత వ్యక్తం చేశారు.

ఆదిలాబాద్, ఆగస్టు 8: తెలంగాణ మహారాష్ట్ర సరిహద్దుల్లోని ప్రాణహిత నదిపై తుమ్మడిహెట్టి వద్ద 148 మీటర్ల ఎత్తున నిర్మించే బ్యారేజీ నిర్మాణానికి రాష్ట్ర ప్రభుత్వం సర్వసన్నద్ధమవుతోంది.