విజయవాడ, గుంటూరు, సెప్టెంబర్ 22: బుధవారం రాత్రినుంచి కురిసిన భారీ వర్షాలకు కోస్తాంధ్ర జిల్లాలు అతలాకుతలమయ్యాయి. గుంటూరు, ప్రకాశం, కర్నూలు, ఉభయగోదావరి జిల్లాల్లో అనేక ప్రాంతాలు జలమయ్యాయి. వాహనాల రాకపోకలకు అంతరాయం కలిగింది. గుంటూరు జిల్లాలో ఐదుగురు మరణించగా ఒకరు గల్లంతయ్యారు. గుంటూరు జిల్లాలో రైళ్లు, బస్సుల రాకపోకలకు తీవ్ర అంతరాయం కలిగింది.

హైదరాబాద్ నగరం నిండా మునిగిపోయింది. భవనాలకు భవనాలే జల దిగ్బంధమయ్యాయి. బుధవారం కురిసిన భారీ వర్షం నుంచి కోలుకోక ముందే గురువారమూ ఆకాశానికి చిల్లు పడిందా అన్నట్టు కురిసిన కుంభవృష్టితో నగరం అతలాకుతలమైంది. రహదారులు నదులనే తలపించాయి. కాలనీలు జలమయం కావడంతో జల దిగ్బంధంలో చిక్కుకున్న కొన్ని చోట్ల అపార్ట్‌మెంట్ వాసులకు ప్రభుత్వం రొట్టెలు, మంచినీటిని పంపిణీ చేసింది. మరోవైపు హుస్సేన్‌సాగర్ ఉప్పొంగుతోంది.

అచ్చంపేట, సెప్టెంబర్ 22: భారీవర్షాలకు పులిచింతల ప్రాజెక్టు, ప్రకాశం బ్యారేజీ నిండుకుండల్లా తొణికిసలాడుతున్నాయి. మునుపెన్నడూ లేనిరీతిలో పులిచింతలకు నీరు రావడంతో అటు తెలంగాణలోని నల్గొండ జిల్లాలో 13 గ్రామాలు, ఎపిలో గుంటూరు జిల్లాలోని 11 గ్రామాలకు ముంపు ముప్పు ఏర్పడింది. ఎగువన క్యాచ్‌మెంట్ ఏరియాలో విస్తారంగా వర్షాలు కురవడంతో పులిచింతలకు వరదనీరు పోటెత్తింది.

హైదరాబాద్/ విజయవాడ, సెప్టెంబర్ 22: రెండు తెలుగు రాష్ట్రాల్లో మెడికల్, బిడిఎస్ కోర్సుల్లో యాజమాన్య కోటా కింద చేరుతున్న విద్యార్ధుల తల్లిదండ్రులపై ఆదాయపు పన్ను శాఖ నిఘా పెట్టింది. బి కేటగిరి, సి కేటగిరి కింద మెడికల్ కోర్సుల్లో చేరిన విద్యార్ధుల జాబితాలను ఆయా కాలేజీల నుండి సేకరించిన ఆదాయపు పన్ను శాఖ అధికారులు తల్లిదండ్రులను గుర్తించి వారికి నోటీసులు ఇచ్చేందుకు సిద్ధమయ్యారు.