కర్నూలు, జూలై 11: అది కర్నూలు సర్వజన వైద్యశాల. వైద్యఆరోగ్యశాఖ మంత్రి కానినేని శ్రీనివాస్ ఆసుపత్రిలో ఆదివారం రాత్రి నిద్రకు ఉపక్రమించారు. చుట్టూ భారీ పోలీసు బందోబస్తు. సిబ్బంది అంతా అప్రమత్తంగా ఉన్న వేళ.. అయినా నాకేం భయం అంటూ ఓ పాత దొంగ యథావిధిగా చేతికి పని చెప్పాడు. ఒకసారి చోరీ చేసి పారిపోయిన వాడు, ఆశచావక మరోసారి చోరీకి వచ్చి పోలీసులకు చిక్కి కటకటాలపాలయ్యాడు.

హైదరాబాద్, జూలై 11: ఆంధ్రప్రదేశ్‌లో పశుసంపదను పెంపొందించటం ద్వారా వ్యవసాయ అనుబంధ రంగాలను బలోపేతం చేసి, రైతుల జీవన ప్రమాణ స్థాయి పెంచేందుకు ప్రభుత్వం ప్రయత్నిస్తున్నట్లు ఏపి స్పీకర్ డాక్టర్ కోడెల శివప్రసాదరావు వెల్లడించారు. ముఖ్యంగా బ్రెజిల్ తరహాలో ఒంగోలు జాతి పశుసంపదను వృద్ధి చెందేలా చూడటం ద్వారా, రైతులకు ఆర్థిక ప్రయోజనం అందుతుందని వివరించారు.

తిరుపతి, జూలై 11: కృష్ణా పుష్కరాల సందర్భంగా భక్తులకు అన్నప్రసాద వితరణ చేసేందుకు ఏర్పాట్లు చేపట్టాలని టిటిడి కార్యనిర్వాహణాధికారి డాక్టర్ సాంబశివరావు అధికారులను ఆదేశించారు. తిరుపతిలోని టిటిడి పరిపాలనా భవనంలో తన ఛాంబర్‌లో అధికారులతో ఆయన పుష్కరాల ఏర్పాట్లపై సమీక్షించారు. టిటిడి కల్యాణ మండపంలో అన్నప్రసాదాలు తయారుచేసి రోజుకు 24 వేల ఆహారపొట్లాలు భక్తులకు పంపిణీ చేయాలని అదేశించారు.

న్యూఢిల్లీ, జూలై 11:చారిత్రక శబరిమలై ఆలయంలోకి 10-50 సంవత్సరాల లోపు మహిళలను అనుమతించకూడదన్న అంశాన్ని సుప్రీం కోర్టు రాజ్యాంగ బెంచికి నివేదించే సంకేతాలు వెలువడుతున్నాయి. భారత రాజ్యాంగం ప్రకారం మహిళలకూ సమాన హక్కులు ఉన్నాయని, వీరిని శబరిమలై ఆలయంలోకి అనుమతించక పోవడం వారి ప్రాథమిక హక్కులను ఉల్లంఘించడమేనని న్యాయమూర్తి దీపక్ మిశ్రా సారధ్యంలోని ధర్మాసనం పేర్కొంది.